Bu gün Hilton Otelində İREX və Multimedia Mərkəzi tərəfindən Yeni Medianın Proqramları və Onlayn media kurslarının Təqdimatı mərasimi keçirilib.
Təqdimat mərasimində İREX Azərbaycanın rəhbəri Angela Nicoara, Təhsil nazirinin müavini Qulu Novruzov və Multimedia Mərkəzinin rəhbəri,AİF –in prezidenti Osman Gündüz açılış nitqi işə çıxış ediblər. Təhsil Nazirinin müavini adı çəkilən sahənin inkişafının əhəmiyyət kəsb etdiyini vurğulayıb. O, ölkədə peşəkar kadrların hazırlanmasında, Azərbaycanla bağlı həqiqətlərin beynəlxalq ictimaiyyətə çatdırılmasında təqdim olunan resursların əhəmiyyətli rol oynayacağını qeyd edib.
İREX Azərbaycanın əməkdaşı Ülviyyə Əsədzadə USAİD’in maliyyə dəstəyi hazırlanan “Onlayn jurnalistika təlimi platforması”, Osman Gündüz “Yeni Medianın tədris proqramları” mövzularında təqdimatlar ediblər.
Yeni Medianın tədris Proqramlarını “Yeni medianın tədrisinin təkmilləşdirilməsi” layihəsi çərçivəsində Multimedia Mərkəzi hazırlayıb. Layihə ABŞ – Azərbaycan Medianın İnkişafı Fondunun dəstəyi ilə həyata keçirilib.
Multimedia Mərkəzi bildirir ki, yeni medianın tədris Proqramları hazırlanarkən beynəlxalq təcrübə öyrənilib, ölkədə mövcud olan media bazarında kadrlarla bağlı tələb-təklif münasibətləri araşdırılıb, hazırlanan modulların layihələrinin elmi və ictimai müzakirələri keçirilib.
Proqramlar BDU və Azərbaycan Universitetlərinin elmi şuralarında müzakirə edilərək bəyənilib, sahə üzrə ekspertlər və peşəkarlar tərəfindən müsbət rəylər verilib. Yeni medianın tədris Proqramları Təhsil Nazirliyi tərəfindən təsdiq edilib.
Yeni Medianın tədris proqramları artıq kitabça formasında çap edilib. Kitabçaya Universitetlərdə tədrisi nəzərdə tutulan Yeni mediaya giriş, Onlayn Jurnalistika, Multimedia Jurnalistika və Sosial Media fənnilərinin proqramları daxil edilib.
Yeni medianın tədris modulları Təqdimat iştirakçılarına paylanıb.
Təqdimat mərasimində həmçinin adı çəkilən Layihə çərçivəsində BDU-da yaradılan İnternet Studiya haqqında və 7 Universitetə təqdim olunan Onlayn Laboratoriyalar haqqında məlumatlar verilib.
Mövzular ətrafında müzakirələr keçirilib. Müzakirələrdə Azərbaycan Universitetinin müəllimləri Lalə Dilanova və Seymur Kazımov, CASFEN qurumunun rəhbəri Azər Həsrət, layihə rəhbəri Ramil İsgəndərli, professor Qulu Məhərrəmli, Avrasiya Universitetinin dosenti Mətləb Mütəllimov, Yeni media mütəxəssisləri Azər Nəzərov və İlqar Mirzə, BDU-unun müəllimi Könül Niftəliyeva və kafedra müdiri Aynur Kərimova çıxış ediblər.
Çıxışlarda ölkədə Yeni media infrastrukturunun inkişafı, yeni media sahəsində peşəkarlığın artırılması sahəsində təqdim olunan resursların əhəmiyyəti qeyd olunub. Bu sahənin daim inkişaf edən sahə olması səbəbindən Ali təhsil müəssisələrində yeni media texnologiyalarının tədrisinin çevik və effektiv formada qurulmasının vacibliyi bildirilib. Yeni medianı tədris edən kadrların peşəkarlığının artırılmasının xüsusi əhəmiyyət kəsb etməsi bildirilib.
Gələcəkdə bu sahənin sistemli formada dəstəklənməsinin zəruriliyi diqqətə çatdırılıb.
15.11.2012